公民黨11周年黨慶，今晚舉行籌款晚宴，無論左中右各路人馬都有俾面出席，民主黨主席胡志偉、社民連梁國雄、香港眾志羅冠聰等不在話下；3位參選過特首嘅人，候任特首林鄭月娥、薯片叔曾俊華、新民黨葉劉淑儀都有現身，林鄭仲坐到食第2味餸先走，夠晒畀面。其餘包括體院主席林大輝、行會成員羅范椒芬、前醫管局主席胡定旭、剛脫離新民黨的田北辰及前全國政協劉夢熊亦有到場祝賀。

在特首選舉落敗的前財政司司長曾俊華傍晚6時許，在幕僚羅永聰陪同下，率先到場簽名道賀，並與該黨主席梁家傑及前黨魁余若薇人合照，及享用現場提供的手工啤酒。在公民黨安排下，薯片叔叔參觀了今晚的拍賣品，包括一些攝影作品和余若薇的字畫等。

公民黨前立法會議員吳靄儀與曾俊華甫見面，即相視而笑，吳問曾俊華：「而家開心啦？」曾俊華即笑不攏嘴稱：「梗係開心啦！」似乎真係無官一身輕，最後逗留了大約20分鐘才離開。

自由黨榮譽主席田北俊就在公民黨的場刊撰文致意，認為即使「道不同，仍可相為謀，亦可相為友」，祝公民黨以公道為本，民生為念，共建和諧香港。

講到明籌款晚宴，公民黨上下都梗係要搏命表演啦﹗舊年告別議會，當上公民黨主席嘅傑哥梁家傑可算係傾力演出，頭炮先嚟個舞獅表演，功架十足，然後驚喜之作就係換上一身金色裝束，跳咗PPAP嘅舞步，全場都拍爛手掌。

不過講到跳舞，公民黨副主席陳淑莊直頭提升至另一個層次。Tanya着上性感大放送嘅露背晚裝，演出佢苦練咗約10個鐘頭探戈。連林鄭都睇到拍晒手掌，查實Tanya為咗練呢隻舞，直頭賣力到整裂咗胸骨，所以今日嘅表演名符其實係帶傷上陣。

但論最多尖叫聲呢，都係非公民黨首席男神黨魁AY楊岳橋，連同4名黨友譚文豪、鄭達鴻、余德寶同埋錢偉健嘅「削肉救黨」，佢哋5人由月初開始減肥，減到今日合共減到20磅就目標籌20萬，結果超額完成減足43磅，於是佢哋即刻變陣除衫示範「賣肉救黨」，其實佢哋係着咗啲「假肌肉」衫啫！不過AY一脫，個市即刻大升，唔少人搶住損畀佢。公民黨全晚共籌得430萬元。