每晚返到屋企，已經好攰，但係一日在外頻撲十幾小時，精神緊張，點都要輕鬆番一個鐘頭，先至梳洗上床嘅啫。家內最好嘅輕鬆節目，莫過於睇戲，唔係話貶低華語片，無論有線電影台或NOW，冇套好睇，大部份都係粗俗胡鬧片，睇嚟都嘥氣，睇英語電影，現在只有NOW一個電視間中有好電影睇。NOW幾個電影頻道之中，一啲電影播完又播，悶到你暈，一啲係Ｃ級之作，睇都浪費時間，故此想睇番套好戲都唔容易。有人話，點解唔買最新DVD電影睇？唔得，一個月交幾百蚊電視收費，仲要去買DVD？何況自己冇咁多時間坐在電視機前睇足全套㖭。
StarMovies前幾晚播占士邦電影，仲係年青辛康納利做占士邦㖭，睇咗兩套──「金手指」與「魔鬼黨」──老婆簡直對辛康納利着迷，話未見過一個男明星有咁靚仔咁威猛咁吸引嘅。翻查資料，辛康納利生於一九三○年，第一套占士邦電影Dr.No係一九六三年，辛康納利拍「金手指」（一九六四）之時係三十四歲，真係威猛過湯告魯斯、畢彼特等等好多倍，以後嘅占士邦完全唔係嗰皮。辛康納利在一九五七年拍第一套電影，幾乎五十年後，七十六歲咯仍然見到佢在電影出現，愈老愈可愛，英女皇封咗佢做阿Sir，真係啱到極。

睇番四十年前舊片，仲有意外收穫，以今日嘅節奏睇，「金手指」仍然好緊湊，唔算落後，另外，占士邦四十年前用嘅所謂「幻想式」先進特技，今日小兒科到極，可見科技進步之快。再者，當年電影嘅外景，盡皆藍天白雲，海水清澈無比，環境生態好到不得了，教人懷念。不過有一樣傷感，美人自古如名將，不許人間見白頭，四十年前之邦女郎，肉感性感兼美貌，今日可能已經六十幾七十歲咯，佢哋去晒邊呢？相信佢哋𠵱家做咗阿嫲阿婆之後，睇番六十年代之邦女郎形象，不勝感慨，最好叫佢哋嘅孫睇番，等後輩知道阿婆當年靚成咁。