我經常有個幻想：悠悠閒，開住車，邊聽住動聽樂章，藍天白雲……無塞車，無爭位，無難於駕馭嘅擔憂。Hea喺Mazda6S闊落嘅車廂內，8個喇叭讓我被歌聲包圍，暖和嘅陽光由天窗透進車廂。Hea住踩油，漫無目的，然後想像自己製造嘅畫面：火紅奪目嘅Mazda6S在吐露港公路飛馳，靚！女人當然貪靚。

記者：黎頌詩
攝影：陳盛臣
Model：草

戰機式駕駛艙

對大部份女人而言，揀車首個着眼點應該係靚！我就再貪心少少，除咗靚，最好仲夠搶，成街都係無個性！呢日開住火紅Mazda6，有少少得戚，梗係啦，以佢嘅外表，喺車群中搶鏡話咁易！淨係以菱形組成嘅頭尾燈組，已經夠風格獨特，揭背版車尾比四門房車更流線，加埋高調尾翼，斯文得嚟又有運動感。「嘩，架車好靚！」身旁嘅靚女睇法一致。就好似有人欣賞你嘅穿戴打扮，自信都升級。外表睇得，裏面嘅要求又要高啲。坐上司機位，簡易就手多角度調校嘅電子記憶座椅首先討好，內櫳比想像中闊落，前後排空間感都不俗。天窗唔大，好過無！不過一套八聲道嘅BOSE音響組合，實屬超班！車廂感覺高雅斯文，有啲歐洲味。軚環同座椅「皮氣十足」，中控台鋪排簡潔，如戰機式駕駛艙起動顯示就更加叫人眼前一亮。

Sporty個性

一直覺得，Mazda坐得舒服係因為你唔會有壓力。錶板中控台清晰易明，操控一摸上手，即使Mazda6車身較長，駕駛依然得心應手。Hea住揸，由將軍澳出發，即興入西貢再往西沙嘆個海景午餐。沿途路窄多彎而且車多，唔算迷你嘅佢都算身手靈活，左掟右掟都穩打穩紮，Sporty個性明顯。之後再經馬鞍山入吐露港公路，仲Hea。大直路暢通無阻，踩到去100公里，再試試加減波反應。有趣係加速反應溫柔，暢順得要不時留意是否已超速。當然用加減波自主性較強，咦，原來Mazda6嘅加減波撥片設計較獨特，一邊有齊加減，唔慣，但適應咗確方便。整個行程喺大埔結束，佢就咁樣陪我嘆咗個下晝，佢表現滿分。不過，有時我會想激啲，佢又好似唔夠癲……我係咪貪心到過咗火？

1. 以菱形做主調嘅頭燈及霧燈，令Mazda嘅賣相極有個性。

2. 側燈連指揮燈，造型靚仔。

3. 不算收斂嘅尾翼為斯斯文文嘅揭背車加點動感。

4. BOSE音響組合嘅8個喇叭，隨時喺車上開Show。

5. 未摺叠後排椅背，尾廂都已經大得驚人。

6. 我要出動啦，袋住佢走近座駕，車門就自行開鎖！

7. 車仔唔啱我，夠闊落舒服，先至享受到駕駛樂趣。

8. 內櫳鋪排斯文得嚟又有幾分貴氣，同我襯到絕啦！

9. 梗係要按鈕式撻車啦，方便又夠潮，Buy！

10. 軚環加減波撥片，要提升操控性靠晒佢。

11. 前排座椅可作多角度電動調校，對於對視野要求苛刻嘅我好重要。

12. 揸車想要咁嘅Feel，唔想開篷，天窗梗唔少得。

Mazda6S規格

引擎：2,488c.c.直四DOHC
馬力：170hp/6,000rpm
扭力：23.0kgm/4,000rpm
傳動：5前速自動+/-波
查詢：MazdaHK（28931112）
售價：$270,990