明年就係立法會選舉，各黨派內部要爭位出賽，民主黨主席劉慧卿早前建議舉行黨內選舉論壇，向外一展辯才同能力，卿姐噚日同傳媒茶聚，話搵咗《城市論壇》前主持謝志峰同佢一齊搞呢壇論壇。卿姐仲話若佢再戰新東，一定會出戰論壇，與積極考慮出戰新東嘅民主黨總幹事林卓廷上擂台「過招」。
由於民主黨4月中會敲定人選出戰立法會，卿姐話擬於明年2、3月舉行論壇，並計劃安排學者或名嘴質詢準候選人，初步諗喺大學搞。佢話，唔計租場，每場大約花10萬蚊，該黨會諮詢法律意見，睇吓計唔計落選舉經費。

邀謝志峰做搞手

有多年主持論壇經驗嘅謝志峰同卿姐講，論壇場內嘅保安交晒畀佢就得，卿姐已問過有意喺新西同港島出選嘅黨友，佢哋都支持搞選舉論壇。
咁卿姐自己又點先？佢大賣關子，話如果佢同林卓廷都出選新東，佢一定「以身作則」同阿廷喺擂台比併。卿姐提醒黨友辯論時要有風度，否則拖累黨內評分，無緣出選：「唔好有惡毒嘅人身攻擊，如果咁做，黨友都會睇到。」
此外，民主黨明年籌款目標為800萬，2月25日會舉辦黨慶酒會兼晚宴，今年更會升格到酒店筵開30、40席。卿姐明年係咪會交棒畀乳鴿？卿姐話總之希望有競爭，但就話領導民主黨要肩負團結黨內上下、替黨公開解釋立場、與商界接觸爭取支持等任務。想上位嘅乳鴿，聽到未？

李八方
mailto:[email protected]