前商務及經濟發展局局長馬時亨越來越吃得開喎，就連扮模特兒展示手錶、Chok晒影相都難佢唔到，唔知幾時有人搵佢拍廣告做代言人呢？
話說股評人陳永陸（陸叔）替港產陀飛輪品牌萬希泉設計咗一批牛錶，每隻定價4.28萬元，部份款項會捐畀幫助醫治白內障病人嘅健康快車，馬時亨噚日就係以健康快車副主席身份出席牛錶嘅發佈會。
馬時亨雖然來去匆匆，只逗留咗半粒鐘，但係佢相當識做，戴住陸叔設計嘅牛錶擺晒甫士任影唔嬲，仲同陸叔攬頭攬頸，齊齊Chok住晒錶，佢兩位應該都幾老友。
影完一輪，馬時亨似係好有體會咁話「做Model原來好難」！
奇怪嘅係，佢離開嗰陣，手上隻錶唔見咗，唔係跌咗幾萬銀吖嘛？原來唔係，佢只係好似明星出場有人sponsor咁，隻錶係萬希泉借畀佢影相用。佢話自己未買牛錶，因為實在太搶手，佢諗住等下一批出貨先至買，到時佢就會有人生第一隻陀飛輪嘞。

6號錶傳獲出價10萬

陸叔設計呢隻好意頭「牛錶」，首批200隻中，130隻已經出廠，其中80隻由陸叔包銷，其餘喺萬希泉同埋太子珠寶鐘錶分店有售。
而80隻附有編號嘅牛錶當中，代表陸叔自己嘅「6號」錶將會公開慈善拍賣，據聞，有股評人出價66,668元，但有人已經出價10萬元，難怪陸叔都好高興咁話，拍賣反應好踴躍，佢打算稍後先至公佈拍賣日子同詳情。
陸叔認真大面子呀，除咗有人想高價投錶，噚日仲有一大班股評人到場支持，令發佈會現場極之墟冚，唔少股評人仲一人一隻牛錶戴住去撐場，認真有心。

李華華
mailto:[email protected]