【尋獎啟示】入選Fifa最佳11人 法女足球員搭火車唔見咗個獎
里昂FIFA法國女足蓮娜
對於現代人嚟講,唔見嘢簡直就係家常便飯,但如果唔見嘅個獎座,你又有冇試過?話說近日法國女子足球員蓮娜(Wendie Renard)喺搭火車嗰陣就大頭蝦唔見咗行李,而件行李入面就有佢上年入選Fifa最佳11人嘅獎項,搞到佢好心急想搵個獎。
29歲嘅蓮娜效力法國女足班霸里昂,而前排佢搭火車由巴黎去里昂嗰陣,就好唔小心咁漏低咗件行李。行李入面除咗有Fifa最佳11人嘅獎座,仲有另一個由雜誌法國足球頒畀佢嘅獎。當蓮娜知道唔見咗件行李之後已經即刻返去火車站,而火車公司亦幫佢搵返件行李,但係入面就得一個獎,Fifa最佳11人嘅獎就唔見咗。
之後蓮娜就喺自己嘅Twitter上載尋物啟示,希望大家可以幫幫手搵返嗰個Fifa最佳11人獎項,同時佢都多謝火車運營公司嘅幫忙。