周二U21歐國盃4強，西班牙U21以3:1淘汰意大利U21，決賽火併德國。其中沙奧尼古斯可謂大爆發！呢位22歲馬德里體育會中場大演帽子戲法，先喺53分鐘禁區內燙射攻破「新保方」基安隆基當拿隆馬十指關開紀錄，就算俾意大利靠貝拿迪斯治扳平，但佢喺65分鐘離門近30碼射入世界波，74分鐘再接應馬高阿辛斯奧傳中撞射破網，目前以5球領先射手榜，領先射入3球嘅隊友馬高阿辛斯奧同埋已經出局嘅葡萄牙前鋒布魯馬，以一位中場嚟講實在唔簡單！難怪西班牙傳媒早前報道，指巴塞隆拿斟介巴黎聖日耳門中場馬高華拉堤觸醮後有意招手，連曼聯門將迪基亞喺社交網站向佢送上祝福時，亦有好多魔迷希望英國傳媒報道成真，將沙奧尼古斯收歸旗下！不過，馬體會今夏被禁招兵買馬，絕對唔會輕言放人，索價最少3,500萬鎊（約3.5億港元）。

除咗沙奧尼古斯炙手可熱，仲有兩位「斯」兄弟都係轉會紅人，英國傳媒盛傳愛華頓已經同馬拉加前鋒辛度拉美利斯達成轉會協議，將會支付520萬鎊（約5,200萬港元）買斷費，點知西班牙傳媒又話皇家馬德里臨尾殺出想做「程咬金」，但呢位21歲前鋒話晒係巴塞隆拿青訓出身，會唔會騷皇馬先？至於貝迪斯20歲翼鋒丹尼施巴路斯呢場扭得性起，連「直角假身」都出埋，第一球亦係靠佢交出助攻，據報佢嘅合約亦有買斷條款，價錢不過係1,320萬鎊左右（約1.32億港元），以今時今日水漲船高嘅轉會市場嚟講抵到爛，據報皇馬同樣有意出手。