當年今日
關於我們

【操盤手札記】從鬼谷子看貿戰(割柑人)

蘋果日報 2019/06/03 18:00

中美貿易戰割柑人操盤手札記

特朗普四圍打貿易戰,中國之外,再闢墨西哥、印度戰線。美國國債孳息曲線倒掛惡化,預示衰退風險增加,資金湧向長債避險。10年期債息一旦跌穿2厘,美股以至全球風險資產,勢現恐慌性拋售。面對衰退風險,聯儲局首次暗示有機會減息。
中美貿易戰已超越貿易層次,升至意識形態嘅新冷戰層次。喺冷戰之下,中美各自拉攏盟國。此情此景,令人諗起戰國時代,鬼谷子兩大弟子蘇秦、張儀,各以合縱、連橫之計游說列國。近日美國正副總統就出訪五眼聯盟成員國,勸說封殺華為。
各國有無站隊呢?國際政治講嘅係利益唔係道義,正如鬼谷子所謂:「非獨忠信仁義也,中正而已矣。」以歐盟、東盟為例,未見站隊。中美長期角力,歐盟就可拖遲關稅戰,東盟更可漁人得利,越南、柬埔寨等國正不斷接收撤出中國嘅生產線同訂單。
市場盛傳,中國準備打稀土牌反制美國,呢兩個星期,稀土股已炒咗兩轉。不過,炒稀土股,一要注意有無稀土礦場,二要注意有無業績支持。港股之中,打住稀土牌頭嘅,大多既無礦場,甚至長年虧蝕。真正嘅稀土股,集中喺A股,唔好炒錯。
中國有稀土牌、美債牌,姑勿論係咪可行。咁美國又有咩牌呢?David Webb話,有資本制裁牌!美國基金有數以千億美元計嘅資本投資喺中國股票同債券,特朗普可利用外國資產管制處(OFAC)嘅權力,命令基金撤資。舊年4月,美國用過呢招制裁俄鋁(486)。
習近平早前去江西考察稀土企業,引嚟稀土股炒作;佢近日又對垃圾分類作出重要指示,強調實行垃圾分類,為綠色發展、可持續發展作貢獻。周一,環保股應聲炒起,粵海投資(270)飆4.7%,報16.14元破頂,突破頭肩底頸線,不妨留意。
割柑人
---------------------------
【六四30】守住歷史 拒絕遺忘
https://hk.adai.ly/zdzKtt2RiW