當年今日
關於我們

【短片】【天王天后罷玩】傳Eason祖兒 缺席頒獎禮安仔人妻Kay玩晒!

蘋果日報 2014/11/26 06:00

蘋果王菀之周柏豪容祖兒張敬軒頒獎禮李克勤古巨基楊千嬅陳奕迅即時爭獎

一年容易又到樂壇頒獎禮,近幾年唔少天王天后級歌手,都缺席頒獎禮,加上換獎爭獎傳聞多多,令頒獎禮屢見失色。

今日就有雜誌報道指,過往係樂壇頒獎禮大贏家嘅陳奕迅(Eason),據知今年唔會出席任何頒獎禮外,仲傳出容祖兒及李克勤都罷玩。

報道指Eason今年主力做巡迴演唱會,加上佢已經出席咗咁多年,以前都仲話有李克勤﹑許志安﹑古巨基及張敬軒同佢一齊,但現時樂壇氣氛唔同晒,就算Eason再幾勁﹑再攞多個獎都冇乜意思,所以報道話Eason今年會休戰。

同樣休戰嘅仲有祖兒,事實上祖兒今年腳步明顯放緩,而且佢年初舉行完跨年個唱後,聲帶出現問題,要好好休息調理身體。

報道又引述「知情者」話,指祖兒已經冇咗爭贏心態,近年都係同楊千嬅爭獎,要贏都贏到夠,況且今年英皇同大台關係出現變化,大家都唔使俾面對方,反正都係小圈子遊戲,已攞過九次大台最受歡迎女歌手嘅祖兒,就算唔參與大台頒獎禮,都冇乜損失咁話。

咁Eason﹑祖兒及克勤呢啲一線歌手唔玩,仲有邊個參加頒獎禮呢?報道就話造就入行28年嘅許志安及人妻謝安琪玩晒,當然仲有周柏豪﹑王菀之及張敬軒,來來去去都係呢幾個玩晒咁話﹗