中資集團中歐體育原定於3月3號完成收購AC米蘭嘅手續，不過有傳由於呢次收購涉及嘅手續太過繁複，令到交易需要延期；有消息指中歐體育原本想分期付款，但俾AC米蘭拒絕咗。

有意大利傳媒爆料，主席貝盧斯科尼因為遲遲都未完成交易而勁嬲，佢仲話：「如果再收唔到錢，我就唔會賣啲股份！」據悉貝盧斯科尼早前已經收到中歐體育兩億歐元（約16.5億港元）定金，而今次協議收購價係7.4億歐元（約61億港元），當中包括2.2億歐元（約18.1億港元）債務。

有意大利媒體懷疑，中歐體育推遲收購嘅主因，同中國政府現時嚴格限制資金流出嘅政策有關。