龔嘉欣近日憑劇集《幕後玩家》出色表現，受到唔少網民大讚演技進步，啱啱仲喺大台頒獎禮上得到女配角同飛躍進步獎兩個提名。今日嘉欣就去新城做訪問，講到套劇即將去到結局篇，劇情會有另一番高潮：「講我患上咗情緒病，精神會經常大起大落，我用咗好多心機去演。」

對於得到好多網民讚賞，嘉欣話好多謝大家支持，咁嚟緊頒獎禮有冇信心？龔嘉欣話：「我都好有信心，希望可以得到一個肯定。」雖然有兩個獎提名，但嘉欣話最想攞到女配角獎，仲話已經準備緊戰衣，預告到時唔騷心口淨係騷腳：「因為要行紅地毯，騷腳會靚啲。」

過兩日就係嘉欣嘅27歲生日，到時會點慶祝？佢話：「無咩特別，同屋企人食餐飯。」冇男仔約咩？佢話：「真係冇喎!而且下星期開新劇，要拍到過埋農曆新年，完全冇時間。」