【獨佔6分20秒air time】歐陽震華搲回巢? 「希望嚟緊可以講吓我嘅得獎感受就好喇!」

蘋果日報 2018/12/16 23:40

歐陽震華福將頒獎

曾經被喻為大台「福將」嘅歐陽震華(Bobby),今晚以頒獎嘉賓身份返大台,頒發最受歡迎電視女角色及視后兩獎,佢一出場,即獲坐喺現場嘅演員歡呼歡迎,雖然今晚節目有啲over run,台下啲幕後工作人員都不停「撩」啲嘉賓,催佢哋講快啲,不過,你有你撩,Bobby懶理繼續講佢嘅「頒獎感受」。
其中Bobby提到自己好耐都冇返過大台,多次強調自己「好耐冇攞過獎」,而佢多謝嘅名單,全部都係高層,包括珍姐曾勵珍、樂易玲、Sandy余詠珊、杜之克、李寶安及已經離開大台嘅梁家樹等。Bobby話多謝啲人教佢、畀機會佢等等等等,總之任由啲工作人員喺台下催,佢有佢繼續台上講。
講到第二part,即係頒視后前嗰段多謝說話,Bobby終於講到重點,話自己早排去咗大陸中央台做音樂節目,佢話:「我係唔需要審查,同埋我仲有巿場㗎!中央台都搵得我,所以阿杜生(杜之克),你咁多合拍劇,唔係一定要林文龍嘅,係,林文龍係靚仔,無可否認,佢靚仔,但係我忠心!我流住嘅係TVB嘅血,諗諗佢吖,樣嗰啲嘢,可以微調嘅啫。」講到咁白,大家都聽得出啦?
再然後,Bobby臨收尾嗰句,係話:「我希望嚟緊嘅日子,可以有機會講吓我嘅得獎感受咁就好喇!」兩part夾埋,講咗起碼6分20秒,以大台今日超時嘅時間嚟計,其實冇咗就好似啱啱好……
另外,大家仲記唔記得早幾年大台頒獎禮食雞事件?結果件事鬧上法庭,大台被判罰款,今年呢,當然,頭盔早戴定,喺節目播出前已話可能有宣傳,結果呢?雞就冇得食,但好多得獎人都感動到喊,自然就需要紙巾,再然後,就成盒紙巾放上頒獎枱面,用過紙巾嘅人包括一開場就攞萬千光輝演藝人大獎嘅薛家燕、專業演員大獎嘅盧宛茵、憑《女人四十》奪最佳非戲劇節目嘅田蕊妮、視后陳煒,至於憑《森美旅行團》得獎嘅森美,就搞笑問人攞紙巾抹嘴角啲口水。
的確,用紙巾合理好多嘅,唔知大台今日洗手間啲廁所有冇換上同一品牌呢?
精選娛聞,喺晒《娛果》
http://fb.com/appledailyent
empty
Bobby個talk分兩part,各長約3分鐘,講到底,就係不停多謝高層。(電視截圖)
empty
阿田攞獎後落喊晒,工作人員遞紙巾俾佢,佢最後索性全成盒放喺枱面。(電視截圖)
empty
盧宛茵奪獎後眼濕濕,都係由工作人員遞紙巾俾佢抹眼淚。(電視截圖)
empty
森美就攞紙巾去抹口水,認真鬼馬。(電視截圖)