上海申花中場秦升喺中超怒踩天津權健嘅比利時外援韋素，除咗俾球隊內部處分、減至最低工資同踢落預備組外，仲俾中國足協重罰停賽半年兼罰款120,000人民幣（約13.6萬港元）。

韋素近日返國家隊集訓時，就大爆其實自己都係收到領隊「大簡」簡拿華路嘅柯打，所以先會喺比賽時嘗試激嬲秦升：「大簡同我講過，呢個球員好容易衝動，所以嗌我比賽時撩吓佢。而我喺一次開角球時，就會膊頭撞咗佢一吓，點知佢就一腳踩落嚟。」

不過，韋素就話覺得足協對秦升嘅判罰太重：「我唔係好了解呢個球員，我聽人講佢唔係第一次喺場上做出呢種行為，可能咁就係佢要停賽半年嘅原因。假如只係因為踩咗我一吓就要停賽咁耐，咁就真係罰得太重喇。」