【內容更新】瑞聲科技（2018）喺公佈季績前夕，就被沽空機構「葛咸城研究」狙擊，股價大跌逾一成。瑞聲科技於下午2時左右，發澄清公告，強烈否認報告內容，又指正就此徵求法律意見。

不過，公司出呢份通告時，似乎真係好趕。趕到點呢？趕到將「情況」錯寫成「情侶」。當公司提到，除將於明公佈首季業績外，「並不知悉任何必須公佈以避免本公司證券出現虛假市場情侶的資料」，知啦知啦，冇「虛假市場情侶」，係真愛啦OK？

唔止，仲有公告最後一段，將「股東」寫成「股來」。即係咁，如果用速成打，「東」個碼係「木田」；「來」個碼係「木人」。打錯咗個碼呀！

另外就係，公司成份公告短短300幾字，竟然將「本公司正就此事徵求法律意見，並保留對採取法律行動之權利。」呢一句，一字不漏重複寫兩次。一係，就真係唔小心寫多咗一次，一係，就瑞聲覺得呢句很重要，所以要講兩次。

呢份通告出咗之後一個鐘後，瑞聲科技再出一份新嘅通告，「虛假市場情侶」就唔見咗，「股東」個「東」字都寫返岩，另外，講法律意見嗰句呢，亦都只出現一次。

掌握財經生活資訊，即Like「蘋果ATM」fb專頁啦！
http://fb.com/appledailyatm