至於另一位獨董就係分眾傳媒創辦人江南春,分眾03年喺美國納斯達克上市,佢身家超過90億,喺「2008全球華商富豪500強」排第136位。
現年36歲嘅江總,上月底仲娶埋已經「有餡」、祖籍台中嘅鳳凰衛視女主播陳玉佳,喺當地舉行「江陳會」世紀婚宴,台中市長胡志強亦有到賀,真夠面子。
講番現代傳播呢間公司,雖然只喺1998年成立,但發展速度驚人,03年7月收購咗香港《號外》雜誌,目前喺內地經營8份消閒刊物,以《周末畫報》最為厲害,去年廣告收益名列全行第3。呢盤潮爆生意咁掂,搵番兩個猛人幫手,可謂「強強聯合」。