【去年拍拖睇Leon】傳袁偉豪有人追 舊愛岑杏賢偕女友人睇騷
岑杏賢李彩華袁偉豪何遠恆
岑杏賢去年同袁偉豪一齊睇Leon,今年隻影相單。(攝影﹕陳俊強)
袁偉豪去年底與拍拖兩年幾、2012年落選港姐岑杏賢分手,兩人早視對方為結婚對象,可惜女方疑嫌男方女人緣太勁,最終分手。
今晚7點半,岑杏賢同一名女性友人現身中環海濱準備睇Leon演唱會,猶記得岑杏賢去年係同埋袁偉豪一齊去,如今兩人分手,袁偉豪最近仲傳畀李施嬅力追添。岑杏賢話﹕「本身鍾意Leon,上次都有嚟睇,原本今次唔嚟,但咁啱朋友有飛。」問到怕唔怕凍?佢話﹕「都怕,冇帶頸巾,係咪要企喺度睇o架?」
另外,仲有李彩華(Rain)同男友何遠恒,Rain話﹕「我哋都拍咗拖一段時間,大家都知知地。(專登帶埋佢嚟?)係,大家都係Leon fans,大家有共同話題,一齊睇會開心啲。(坐邊?)我有VVIP區同普通區,兩邊都去。」提起男友,Rain個樣即刻好冧,自爆男友唱過黎明名曲《對不起 我愛妳》畀佢聽,問等陣會唔會叫男友係耳邊唱?佢話﹕「梗係唔會,叫Leon唱,上次之佢個騷我要拍劇嚟唔到睇,今次就叫朋友留飛畀我睇。但我都怕凍,着咗兩件內衣打底,相信唔會凍,因為勁歌熱舞。(帶咗男友做人肉暖包?)唔使啦,相信大家都會玩得開心。」同場仲有陳小春、謝天華、張家瑩、莊思敏、莊思明等捧場。
據悉今晚現場可以容納1萬6千人,入場人士雖然要過兩關,但秩序大致暢順。李彩華口中嘅VVIP只有約20個包廂係有座位,每個包廂限8人,其他人全部都係企位,所以有人帶摺櫈都會即刻被抽起。而現場好似嘉年華會咁,有PIZZA、炸蝦、日本菜等美食出售,當然唔少得酒類飲品,啤酒500ml賣$70、香檳$100一杯。