做咗老竇嘅E-kids成員阮民安（Tommy），噚日帶被喻為「原宿女神」老婆張倚雯（Eva）返娘家鄉下南寧，為囝囝Caesar擺百日宴兼補擺喜酒，有讀者提供咗擺酒嘅相片畀《蘋果》，一家三口首曝光，扮成水手嘅Caesar好似個波咁肥嘟嘟，被媽咪舉起時更擘大O型嘴，面圓口圓超可愛。

Tommy接受《蘋果》電話訪問表示，囝囝中文名叫阮治童，o依家已經重16磅，佢話：「因為Eva鄉下喺南寧，今次同佢返去諗住純粹食餐飯，同鄉親父老叔伯兄弟見面，諗住大約四、五圍，佢屋企人安排時一呼百應，最後擺咗23圍，估唔到大家咁踴躍嚟見下Eva同小朋友，唔排除有啲嚟見我，哈哈。」

至於囝囝中文名治童，原來係媽咪Eva嘅意思，Tommy話：「雖然唔怕生壞命，但最怕改壞名，我呢啲成日行錯路搞冤枉嘢，所以唔好掂，佢媽咪呢幾年主要喺日本做model，想囝囝要日本啲嘅名，最後揀咗治字，童當然希望佢永遠有童真，想統治兒童意思，硬淨啲唔好畀人蝦，亦唔好蝦人。」

治童三個多月大已經重16磅，Tommy表示：「佢嗰種多肉地係肥仔，手腳全部一節節，唔知佢啲營養邊度嚟，肥仔一名，老人家話肥易湊啲，希望佢繼續身體健康。」問到湊囝係咪好辛苦？佢話：「頭兩個月Eva最辛苦，每兩個鐘起身餵奶掃風，我係非常佩服所有媽咪，Eva好好彩係自由工作者，彈性選擇時間做，返工媽咪前四後六好大壓力，要畀掌聲媽咪。」

自從囝囝出世後，每日變化都令人父Tommy好難忘：「我有首歌寫畀佢同媽咪，送畀天下偉大父母，嚟緊父親節真係冇乜感受，我唔係好在意節日，覺得都係咁過，所以平常心，都係望住佢飲奶。」

想隨時獲得更多親子資訊，快啲like Easy PaMa Facebook啦！
https://goo.gl/1qWM8g