紅灣半島終於惡化為醜聞，一大堆新樓，通通要拆清，重折墮過將啲食剩嘅自助餐倒落餿水桶萬倍！
中國人最驟忌就係「折墮」──有白飯唔食倒落海，褻瀆自然，暴殄天物，老人家教誨：會雷公劈！世上咁多窮人，大陸咁多地獄礦工，一日做牛做馬運煤炭，都只係賺得一蚊！而董團夥折墮政府，賤賣紅灣半島畀地產商，將啲新樓拆清起靚屋。到時邊個再敢買？因為到時買咗都驚雷公劈！

胡總釋法就得
紅灣半島變咗醜聞半島，高科技港、中藥港、環保港、全屬亂噏，特區胡混七年半，今年經已超額實現變為一個「折墮港」。
講起折墮，當日嘲諷港人「有咁耐風流、有咁耐折墮」嘅財政司司長梁錦松，新官上任，發揮強勢行政主導，揮刀劍，斷盟約，下令公務員大減薪，點知上訴庭法官二比一裁定，松松做財爺嘅特區政府，公然違反基本法第一百條！因為基本法話到明：公務員薪酬福利，喺所謂「回歸」之後，不准低於殖民地原有水平！
大法官莊嚴宣布：呢一條，係對公務員利益憲制上嘅保障！公務員減薪，就係違反基本法！
咦，乜基本法唔係香港各界精英精心炮製嘅民族智慧結晶咩？點解會變咗作法自斃嘅？又話強勢行政主導，又話要協助董建華更好地施政，嘿，點知𠵱家上訴庭咁判法。
董政府又唔係冇法子嘅。一係就搵胡錦濤親自口述對基本法第一百條嘅釋法指示：「薪酬福利不低於一九九七年前嘅水平」──有一個「前」字，就冇話一定指明係一九九七嗰一年，可以係指一八九七年，亦可以指一九四七年！咁公務員減薪，根據中央阿爺釋法，理論上只要唔低於一八四二年香港割讓畀英國嗰一年嘅清朝官員俸祿，就冇違反基本法！