【同無綫睇齊】被納入電視節目欣賞指數調查 《矛盾》打入第二位
《煮吧!換咗我阿媽》《同2047特首上學去》《歐遊全細界》《跟住矛盾去旅行》港大民研計劃
喺今年4月先開台嘅ViuTV,有4個節目打入最高欣賞指數頭二十位,同無綫睇齊!
港視發牌夢碎,亞視又熄咗機,不過好彩ViuTV喺今年4月正式開台,所以令到觀眾有得揀,總算打破一台獨台嘅局面。雖然ViuTV開台只係接近5個月,但係佢已經製作咗唔少節目,好似《跟住矛盾去旅行》、《同2047特首上學去》、《瑪嘉烈與大衛系列 綠豆》同埋《歐遊全細界》等等,呢啲節目都成功製造咗唔少話題,好多網民仲讚不絕口。
噚日港大民研計劃公佈2016年第二季(4-6月)電視節目欣賞指數調查結果,今年4月6日開台啟播嘅ViuTV,亦都被納入調查,其中有四個節目打入最高欣賞指數頭二十位,《跟住矛盾去旅行》登上第二位,《同2047特首上學去》排第十位、《煮吧!換咗我阿媽》排第十六,而《歐遊全細界》就排第十八位,結果仲同無綫睇齊,成績好理想。
講到呢個成績,ViuTV嘅發言人話:「多謝觀眾對ViuTV的支持,ViuTV會繼續努力 製作更多優質及富創意的電視節目 為香港觀眾提供真係選擇。」有份參與《同2047特首上學去》嘅灘叔鄒凱光,今日接受《蘋果》嘅訪問,佢話:「真係好開心呀,我哋個節目咁正面,而且又冇啲好大嘅衝突,亦都冇啲好大嘅話題去炒作,純粹用啲正能量同學生去上堂,去製造啲氣氛,但係都可以去到呢個位置,我自己真係好滿意。」灘叔仲好搞笑話:「依家諗番頭,如果嗰陣我做多啲炒作,唔知可唔可以令呢個節目上高啲位置呢?」
另一方面,有份主持《歐遊全細界》嘅蔡雪瑩,佢接受《蘋果》訪問亦都話:「當然好開心喇啦!噚晚監製話我哋知呢個消息,我哋全個團隊都好興奮,我笑話全靠cam man喺摩納哥冒住成為國際通輯犯危險拍那幾個航拍shot,先會令節目畫面咁豐富,大大提高欣賞指數!」陳子豐亦話:「梗係開心喇,第1,係因為我哋ViuTV有4個節目喺20以內;第2,雖然拍呢個節目辛苦,但係出嚟得到觀眾認同,做呢行,最緊要係娛樂觀眾;第3,呢樣先係最開心、ViuTV終放可以納入調查計劃裡面,希望將來會有更加多嘅電視台被納入,多啲競爭,先可以百花齊放!」