當年今日
關於我們

中環在線:牛根生一講老牛好亢奮 - 李華華

蘋果日報 2008/05/28 00:00


蒙牛(2319)噚日開股東會,總裁兼執行董事牛根生對有關業務嘅提問,基本上冇答過,但一講到慈善捐錢,就即刻成個生猛晒,公司有個咁有善心嘅高層,做股東嘅唔知開心定擔心。
牛根生話,佢創立嘅「內蒙古老牛公益事業發展促進會」(下稱老牛)喺地震之後,已經第一時間捐錢同奶粉到災區,佢仲話遲少少災區重建規劃好之後,會再捐多筆,希望可以幫手起學校,同埋助養孤兒老弱。
牛根生話沙士、海嘯發生後,老牛都捐咗幾千萬。咁嚟緊有冇需要配股集資,等隻「老牛」肥啲呢?
牛根生好老定咁話,冇需要,仲話自己嘅股份同花紅,會分批分段咁投入,應該夠養隻「老牛」。跟手仲亢奮到叫口號:「百年蒙牛,千年基金」。