韓國靚媽李敏貞上月忙完拍攝《回來吧大叔》同囝囝嘅周歲宴後，就飛咗去夏威夷為雜誌影新相，不過呢位靚媽似去度假多過去做嘢，事關佢成日喺Instagram上載食好嘢、去玩嘅相，真正嘅寓工作於娛樂！

而李敏貞完成咗夏威夷嘅工作後繼續度假Mode，噚日就喺IG繼續晒，不過今次就攞正牌去玩，因為佢真係放假㗎，不過今次地點就係濟州島。李敏貞上載咗張自己坐喺小朋友玩嘅玩具斑馬上面嘅相，身穿輕便裝束，笑得好鬼開心，完全唔似一個已經34歲、做咗媽媽嘅人。而佢亦留言自己笑自己：「呢位媽咪，你唔可以坐喺呢度㗎......比囝囝更加興奮嘅我。」言下之意唔通其實係帶囝囝嚟玩？不過睇返靚媽嘅其他相，囝囝都係冇入鏡，李敏貞係咪帶埋愛兒嚟就真係不得而知啦。

另外，《聽見你的聲音》女星李寶英前日亦現身首爾一個航空公司公益活動，呢位靚媽產後現身公開活動，顯得明艷照人。