韋達黑氣纏身!泥地不敗賽駒 爭四連捷臨尾香
一哥韋達潘頓蘇保羅添好運
跑馬有旺弱之分!講起黑仔,韋達都算呢兩日表表者,佢繼昨日(3日)在西澳洲客串飲恨一級賽後,這天最尾第十場二班泥地1200米騎大熱門「添好運」又臨尾香,呢匹泥地新貴放到拉士一步頂唔住屈居亞軍,俾潘頓座騎「一哥」後上冚過,「一哥」影相險勝爆冷打破今季齋缽,單Win及組合獨贏A3分別派218.5及38.5元。
比對潘頓同韋達,近日際遇可謂一天一地,潘頓這天尾兩場發威,連勝「四季旺」及「一哥」一熱一冷,囊括第九口孖寶,個人一連兩次賽事起孖。反觀韋達昨午於西澳雅士閣馬場一級賽京士頓城經典賽,策騎Scales Of Justice疑似睇錯終點位置,提早停止催策,最終輸短距離俾連達文座騎「高層明星」做二奶。
賽後韋達匆匆趕返應付今次沙田日馬,原本佢胯下之「添好運」好有機會成為今季首匹四捷馬,可惜該駒初跑二班負輕磅,轉用前置戰略放唔到,亦令韋達一連兩日在澳洲及香港均飲恨,賽後韋達面口麻麻,顯得心情欠佳。連帶「添好運」廐主蘇偉賢這天亦唔能夠連同第四場贏「勁優秀」自製一口泥地孖寶,「添好運」三連勝後斷纜,於泥地首逢敗績。
尾場三、四名分別為「皇龍大將」及「越影」,四重彩派17萬幾,乃係全日同類派彩最高紀錄,至於今期騎師王則由莫雷拉勝出。
睇錯終點線位置?韋達提早停止催策 一級賽不幸僅敗!
http://bit.ly/2gPlJIA