海洋污染問題越趨嚴重，科學家早排再發警告，好多海鮮都含微膠粒，如鍾意食生蠔、青口，推算若每個禮拜食兩份青口，就等如每年吞咗1.1萬顆膠粒，提醒人類盡力守護海洋。磨砂清潔用品、塑膠垃圾流入海洋係元兇。

林德信(Alex)、趙慧珊(Aka)、三鐵運動員司徒兆殷等，今日參加adidas喺科學園舉辦嘅「Run For The Oceans 2018」5公里跑步活動，宣揚海洋環保訊息。熱愛大自然嘅Alex，覺得海洋污染問題越嚟越嚴重：「一直有關注海洋環保，最近亦都開始習慣自己帶水樽出街，希望身體力行影響身邊朋友，唔好用咁多塑膠，減少微塑膠對海洋生態嘅污染。」Alex有跑步同做運動習慣，跑5公里對佢嚟講絕對唔難，不過天氣好熱，起跑無耐佢已經一身汗，輕鬆完成賽事後，Alex開心話：「沿途好多人同我打氣。」

大會仲邀請咗勞嘉怡（Yukilovey）、李拾壹同Alex擔任演唱嘉賓，拾壹都鼓勵大家帶水樽出街，減少廢棄物，從生活習慣做起，減少用塑膠，將垃圾分類。

精選娛聞，喺晒《娛果》
http://fb.com/appledailyent