金像電影《樹大招風》道具領班、「道具全」張偉全就早前被法庭判決他與首被告羅潤霖保管偽製紙幣罪罪名成立，判監四個月、緩刑兩年，今日於高等法院進行上訴，案件續審，未有判決。

完成今天上訴程序後，香港電影工作者總會永遠榮譽會長吳思遠與道具全跟代表律師商議了一陣，之後再於法庭外會見傳媒，發言怒轟政府。

今日道具全在法庭內外一直木無表情，吳思遠發言時，他亦只是站在其身邊，未有補充。發言完畢，吳思遠與電影11屬會成員離開，應是前往用膳，惟道具全未有同行，獨自離開。

吳思遠說：「警方起訴及第一次判決係唔公平，今日未有裁決，但我哋希望有好嘅裁決。今日爭論嘅係道具銀紙冇水印，冇防偽金屬線，有道具兩個字，紙質摸落去係A4『滑劣劣』，點可以同偽鈔相提並論？令我哋好困惑。香港電影要唔要繼續拍落去？電影儘量求逼真，點可以整一張白紙嚟代替？警方告我哋道具錢做得太真，冇考慮電影特殊需要，今次係電影戲劇（《樹大招風》）需要，將道具錢等同偽鈔係一個笑話。」

經過今次官司，道具銀紙製作可有製定新準則？吳思遠稱：「0依家未有準則，會同政府坐低傾，唔單止錢，仲有拍戲嘅警車，拍戲用嘅拖車，0依家全部都係非法，如果嚴格執行起上嚟，警員嘅委任證都係非法，要全盤同政府討論。」

早前報道：
【道具鈔惹禍】金管局與業界達共識 設明確指引 兩周內回覆申請
https://bit.ly/2MGeYbW

「總會日前見咗林鄭，政府喺原則上高度對香港電影業輔助，0依家我發覺香港政府部門互相唔想負責任，但電影係要多部門協調，我哋需要馬路、大樓、醫院、屋邨，如果冇呢啲元素，香港電影冇得拍。」

「以前地政署、警方，都用一種包容諒解去幫助電影界，唔似o依家郁啲就告。電影業走下坡，票房、產量都萎縮冇得做，政府樣樣都阻頭阻勢就冇得拍，時裝片冇得拍或者要返內地拍，呢樣嘢係我哋唔想見到嘅。警匪片係香港電影強項，包含好多元素。」

問到對於籌得多少款項用作今次上訴，吳思遠話：「資金唔講得，但係有足夠資金上訴，感覺好欣慰，因為好多公司、演員支持。就算冇錢嘅，都俾1,000、500支持，我好感動，說明呢個係業界嘅問題。」

雖然吳思遠指政府互相推卸負責任，但最後他補充：「林鄭畀我哋好正面，政府一定支持，搵更多資源幫電影業。但今次檢控係香港開埠歷史來未見過。」