黎耀祥、林夏薇、陳家樂、陳山聰等今日喺將軍澳出席新劇《逆緣》宣傳活動，仲搵咗麥玲玲測字指點迷津。林夏薇寫咗個「明」字問添丁，麥玲玲話今年報喜機會高，而且仲有可能係龍鳳胎添。同場嘅張美妮就指住着鬆身裙嘅林夏薇，問﹕「係咪有喇？」林夏薇事後否認。

林夏薇喺2015年嫁擁有5間上市公司、身家逾20億嘅金融才俊莫贊生，早前有傳佢無限期停工等生仔，佢話拍埋呢套真係要停工﹕「承師傅貴言啦，龍鳳胎梗係好，我好鍾意小朋友，好想生3個，不過我同老公各有各忙，見面都冇時間。呢部劇拍到4月初，之後真係要停拍劇。」對於堂哥林峯同吳千語分手，林夏薇直言冇專登致電堂兄，話﹕「最緊要佢開心囉。（有冇見過佢新女友？）我連我老公都冇時間見呀。」

另外，黎耀祥寫咗個「舒」字，被批今年有機會再次買樓。而陳家樂就寫「得」字問財運，被批略有進步，但置業仍要靜待時機。

精選娛聞，喺晒《娛果》 http://fb.com/appledailyent