食字的確好過食冰，但食字食得差好易九唔搭八，警方前日就完美示範，喺社交媒體出咗兩個食字爛gag諷刺抗爭者犯法，其中一個係「凍奶茶，熱奶茶，犯法一定比（俾）人查」。咁「風趣」嘅品味唔係個個受落，結果一班網民瘋狂回禮笑返班警察轉頭，例如「叉雞飯，火腩飯，黑警有法一定犯」，邊個好笑啲？幽默感嘅嘢真係冇得勉強㗎。

網民IG洗版恥笑

警隊內部不時搞吓啲陳年食字gag標語設計比賽，畀機會一班散仔親親白衫，圍威喂合照威吓，恥力強勁嘅包括2005年沙田警區舉辦「無粗口標語設計比賽」，得獎作品「你有型，我有型，唔講粗口最有型」，唔講真係以為返咗上世紀80年代。講返警方嗰兩個爛gag，除咗奶茶，另一個係「細蓉好，大蓉好，唔做勇武就最好」， 到底抗爭者同雲吞麵有咩關係？唔少人都黑人問號。

相對之下，網民創作就到肉得多，例如民主黨林卓廷就寫「紅豆冰，菠蘿冰，黑警返工就偷冰」，寸爆西九龍反黑士沙私吞冰毒案；民間記者會就寸警察偷水，「食蛋撻，食葡撻，見到有水一定撻」；黃店悅和醬園好抵死咁寸警方夾口供，「半打穩，一打實，唔夾口供最老實」。有啲咩衰過玩一日爛gag？就係玩兩日！警隊噚日再喺IG貼「熱檸水，凍檸樂，犯法行為不要學」，今次網民唔再將創作收收埋埋，直接喺警隊IG留言，有人留言「奶油多，油占多，警察高層僭建多」，撐警藍絲個個駁唔到，一個留言都冇。

李八方