美國網球手兼世界一姐莎蓮娜（細威）日前升榮做媽媽，網球壇唔少人都有為細威同佢啱啱出世嘅囡囡送上祝福，有博彩公司更加即刻幫「細威」囡囡開出咗唔少特別嘅賠率，估唔到阿仙奴咁都會躺著中槍。

35歲嘅「細威」成績彪炳，職業生涯贏過23面大滿貫單打錦標，大家對佢囡囡都可能幾大期望，而英國一間博彩公司為「細威」囡囡開嘅相關賠率，就包括咗成為首位登陸月球嘅女性、做美國第一位女總統仲有同費達拿囝囝結婚，都係501倍嘅冷門嘢，另外仲有做網球世界排名第一球手嘅34倍、贏大滿貫單打冠軍嘅51倍、贏溫布頓單打冠軍嘅101倍、同一年包辦四大滿貫嘅251倍等等，至於最熱嗰樣係咩呢？就係喺阿仙奴捧英超冠軍之前贏到WTA冠軍，賠率係26倍。