【硬刪6分鐘】大陸版《聖約》異形都要被河蟹?理由:血腥
普羅米修斯異形﹕聖約異形:契約
《普羅米修斯》同《異形﹕聖約》就被視為《異形》系列電影嘅前傳,吸引唔少異形嘅fans入場,而前傳第一集《普羅米修斯》全球票房收4億美金,對比成本1.2億美元,賺成3倍有多,而被視為前傳第二集嘅《異形﹕聖約》當然被寄予厚望啦!不過成績就真係唔係咁理想,暫計票房收1.8億美元,都只係cover到成本1.1億美元多少少,而《異形﹕聖約》今日(16號)正式喺大陸上映,大陸票房就好影響呢套戲嘅收入。
不過係人都知大陸有一個政府部門叫電檢,專門檢查國內以至國外嘅電視內容會唔會敏感,據以往嘅案例,色情、血腥、革命成份、怪力亂神等等嘅電影通通冇得留低,又或者要大幅刪減有關敏感題材先可以批准上映。
但今集係講《普羅米修斯》後嘅劇情,異形正式現身,之前有唔少睇咗嘅觀眾,都話異形嘅戲份太少,睇得唔夠暢快。
而喺大陸上映改埋名叫《異形:契約》,近日仲有報道指,欣賞過呢套戲大陸版優先場嘅觀眾都話,套戲cut咗唔少鏡頭。事關異形現身大部份都係喺人嘅腹背「爆出嚟」,血腥就梗㗎啦,加埋見到異形嘅鏡頭少之又少,有網民講笑話:「去看了點映,(異形)正面鏡頭超過2次算我輸,血腥鏡頭或許沒菜市場殺雞的時候多。」刪咗6分鐘,硬cut血腥畫面,唔少人話成套戲冇晒連接,亦有人嬲豬話「列尼史葛為人仔跪低!」咁其實,《普羅米修斯》有啲血腥鏡頭,包括女主角開肚取異形一場,其實都刪咗。