現年21歲嘅韓國女團GFriend成員Yerin，早前撇甩隊友一支公拍攝綜藝節目《叢林的法則》野外求生，Yerin更以素顏出鏡。節目日前播出Yerin孖住李泰煥、梁定原、崔元英等三名演出者出去狩獵晚餐嘅內容，四人幸運地捕捉到一隻大蜥蜴，當李泰煥、崔元英兩位男士見到大蜥蜴而露出驚嚇嘅表情時，Yerin及梁定原兩位女星就相當勇敢地捉住蜥蜴，令觀眾大感意外。

當日四人去到洞穴搵晚餐，李泰煥率先發生有隻大蜥蜴，但佢就一副勁驚嘅表情唔敢去捉，更同崔元英嚇到不停後退，場面爆笑；反而係Yerin及梁定原就勁大膽，合力捉住隻蜥蜴，Yerin更自告奮勇話要處理食材，獨自用刀宰殺蜥蜴。

雖然李泰煥唔敢捉蜥蜴，但亦擔心Yerin自己一個搞唔掂，打算幫手之際，Yerin甜笑地表示：「我依家要砍咗個頭！」同甜美外貌成強烈嘅對比，Yerin本來仲戴住手套整，但後來嫌麻煩索性徙手上陣，將蜥蜴嘅皮肉分離，睇到李泰煥及崔元英呆晒。事後Yerin向節目組表示肚餓嘅話就唔會覺得驚，所以先咁勇敢去捉蜥蜴，認真厲害。