聽日踏入2016年，成個一月政界都有連場好戲上演，且清一色由一男子領銜主演。俗稱「網絡23條」嘅《版權修訂條例》月初喺立法會恢復審議，主責嘅商務及經濟發展局局長蘇錦樑，唔知點樣防止流會重演？之後立法會教育事務委員會傾TSA喎，又係教育局局長吳克儉大發神威（經？）嘅好時機？特首梁振英則喺月中發表施政報告，勢如連任政綱嘅報告到底有冇料到？熱廚房三兄弟渾身解數，帶旺本月嘅花生指數。

●1月6日　續審「網絡23條」　蘇錦樑點箍票？

網絡23條出師不利，上月9日喺立法會未二讀先流會，蘇錦樑喺流會後大會、即係16日大會急急補鑊，雞批蛋撻乜都齊，大批政府狗仔隊進駐，箍住建制派坐定定投票，但喺部份泛民拉布下，連開三日會都未二讀，下月6日再戰。最奇妙之處係，建制派講到明唔會再編更喎。嘩，冇人發號施令，流會風險好高啫？唔通驚市民食唔夠花生？八方聽聞政府中人都巧京京，預咗要做更多工夫箍票，唔知曾以飽食滿足建制人心嘅蘇錦樑，新一年出動乜嘢法寶？

●1月11日　立法會傾TSA　吳得掂有乜say？

如果八方係梁班子成員，一定會眼紅教育局局長吳克儉，因為佢能人所不能，一個月讀成卅本書，其他局長都自愧不如啦！雖則吳得掂博覽群書「內涵」好好，但成日都唔肯喺鏡頭前拋吓書包，大家又點知佢其實有幾掂吖！嗱嗱嗱，立法會教育事務委員會11號又開會嘞，當中一個議題，就係TSA！去年底吳得掂遊日缺席TSA公聽會，成為眾矢之的，而日本嘅紅葉呢，一月已經冇乜，吳得掂理應安心與會解畫，順道騷下讀書得嚟嘅滿肚墨水嘞啩？

●1月13日　宣讀施政報告　CY當造勢咁做？

雖則2017年先至選新一屆特首，但CY爭取連任嘅工程已經展開，大打社福同房屋牌，藉此力爭民心，畢竟佢當年都係因為民望高過唐唐，先令中央另眼相看，而2017年3月就選嘞喎，有政界中人話呀，CY如果要攞分，今年呢份報告就要嚟真，2017年選前兩個月嘅最後報告，出嚟把鬼？求其總結㗎啫！所以政界都密切注意，CY呢份「競選報告」到底有乜料到？再轟本土派博阿爺歡心、抑或派嘢送禮方為上策？呢場提早造勢大騷，唔知會唔會獲北京讚好？