成班人到沙田馬會凱旋廳吃晚飯，約定六點半開始，左丁山準時到達，赫然見到一哥Ｌ已經在座，一哥Ｌ已經退休好耐，仍然極有規律，開會食飯永無遲到。佢話在IFC開會後，揸車經西隧與八號幹線到沙田馬會，二十分鐘抵達，有時仲快過經告士打道去山光道馬會。事實正是如此，黃昏時候在中環坐車行西隧路線，真係隨時到咗沙田馬場，而朋友去山光道仲係塞緊車。
凱旋廳最近推出懷舊家常菜，一哥Ｌ係業餘廚師，有時間開班就教校友煮餸整蛋糕，自然係行家。佢點咗三款懷舊菜式，就係番茄紅衫魚，雞蛋焗魚腸與梅菜扣肉，點知六點半點菜、番茄紅衫魚居然已經話沽清，冇得食，至於梅菜扣肉，好幾位朋友話豬肉太肥，膽固醇太多，唔敢食，一哥Ｌ就嫌啲扣肉唔夠肥，佢話舊時做法，扣肉要肥多過瘦，現在為咗遷就健康食譜，啲扣肉一半肥、一半瘦，與古法原意不符喎！扣肉係越肥越好食嘅！又係嘅，食開健康食譜之人，無論扣肉點樣少肥，都係唔敢食嘅啦，不如索性整肥啲好過。
食得咁肥，真係唔怕？一哥Ｌ話：「你哋大概都係一年食一次啫，唔怕啩！」真係有人怕食嘅，點似得一哥Ｌ咁健康吖，佢嘅血壓係七十零至一百零幾，膽固醇遠低於標準，唔知係唔係以前操得多之故，但一哥Ｌ話退役後應酬大大減少，自己煮畀自己食，啲膽固醇立即降低晒，如左丁山啫，在外食飯多過返屋企吃青菜豆腐，當然有膽固醇威脅。
埋單嘞，會員朋友爭住畀錢，點知一哥Ｌ因為早到，一早吩咐今晚由佢請，馬會夥計當然遵從一哥Ｌ吩咐，其他人嘅會員卡一概唔收，我哋惟有講句多謝。