世界盃今日開始16強賽事，暫時總結一下古靈精怪估波團嘅林作、黃夏蕙、八両金同俄仔Ansheles眼光，竟然以高齡夏蕙最醒，15賽日估中10場勝負，中2場波膽，最渣係林作，佢雖然叫做中過2場波膽，但貼中就只有7場。林作話中2場波膽都易，佢日前孖師姐「翻版法拉」Sumi一齊跳隻世盃開心舞，踢慣波嘅林作手腳係協調，但音樂感就麻麻，好彩有師姐Sumi傍住。

今晚法國VS阿根廷，兩隊星級球隊正面交峰，到底邊隊贏面較高？夏蕙BB林作都睇好阿根廷嘅美斯翻生，會有運行。林作甚至認為美斯會帶領球隊今年捧盃。

法國VS阿根廷

2:3
黃夏蕙：阿根廷憑美斯翻生，佢哋有運氣，法國隊打咗冇運，教練迪甘斯又冇料到，呢場完全唔使驚法國，阿根廷必贏。

2:2
八両金：兩隊勢勻力敵，我覺得會2:2和波。

1:2
林作：今屆所有熱門都表現唔好，連德國都小組出唔到線，我完全有理由相信最後冠軍會係出其不意嘅隊伍。好多人覺得法國人腳勁，但幾場落嚟表現不佳，甚至球員間唔夾。阿根廷起死回生，o依家團結起嚟，絕對係會爆冷。阿根廷會贏，美斯甚至會帶領捧盃，阿根廷再贏。

2:0
俄仔Ansheles：法國贏2:0，雖然我上次話法國踢得好hea，但以前所有世界盃入咗final球隊今屆都唔成功，所以我估今年阿根廷好快都唔得。

一網睇盡
足動世盃 直擊俄國最前線
https://hk.feature.appledaily.com/worldcup2018/