一隻草地貪夜蛾，足以令大國全民草都無得食。近排，香港亦有一隻「娥」，令小島全民寢食難安。難怪「股壇長毛」David Webb話，如果林鄭月娥係一隻股票，會建議沽空佢，目標價係零，並稱之為「Carrie trade」。

現時距離G20峰會不足兩周，習特會尚未落實。喺中美關係緊張下，《逃犯條例》修訂風波令習近平非常尷尬，美方更食住上，放風特朗普會喺G20峰會打香港人權牌。《路透社》爆料，北京認為林鄭處理修例手法拙劣，質疑佢嘅能力。林鄭卸任，進入倒數。

事實上，林鄭唔單止為中央添煩，亦為投資季節中最艱難嘅6月添亂。周一，暫緩修例雖然未能平息民憤，但稍為紓緩資金流走、樓價下跌嘅憂慮，港股喺地產股領軍下反彈，升0.4%。不過，若無新嘅妥協方案，示威仍會繼續影響投資情緒。

本周重頭戲，落喺周四。美國聯儲局本港時間周四凌晨2時公布議息結果，之後輪到日本央行同英倫銀行。美國5月進口物價指數顯示通脹壓力仍低，強化減息預期。市場估計本月息口不變，但7月減息機會率近九成；一旦預期落空，恐怕觸發股市回調。

刻下，修例風波，餘波未了；G20習特會，會期未定。若係政治風波引發嘅跌市，往往係低位入貨嘅機會，但揀股時，要睇行業基本因素有無變化。公用股如中電（002）、港燈（2638）、煤氣（003）等，唔受政治風波影響，若隨大市回調，反係長線買入機會。

大和早前發表報告，認為下半年至明年通脹或會減慢，對收息股有利。公用股向來係收息股穩膽，皆因業務穩健、派息穩定，對食息一族，係現金流穩定來源。兩電一煤中，港燈係商業信託，規定至少九成利潤派息。該股現價股息率5.1厘，走勢呈三重底突破。

割柑人

-----------------------------
你撐蘋果 我捐$1
支援反送中抗爭者