每逢中秋更令人期待「人月兩團圓」，單身咗半年嘅趙哲妤襯呢個團圓佳節，就搵嚟師叔司徒法基拜月老求姻緣，儀式中趙哲妤非常誠心聽住師叔指點祈求姻緣同人緣，師叔喺儀式尾段為趙哲妤喺眉心同手背搽上人緣香水，跟住再贈予祈求姻緣法事中加持的月光石珠鏈，師叔話：「只要戴住唔好畀人掂到，每逢初一、十五就用掌心合十祈福，另外見人前就喺眉心搽少少人緣香水。」

趙哲妤同師叔司徒法基認識多年，每逢於事業或姻緣上遇到問題，都獲得師叔指點，佢話：「希望喺中秋元宵佳節，能夠拜月老祈求姻緣，想快啲搵到另一半，令個人都開心啲，另外做娛樂圈嘅人緣都需求好大，需要多啲人支持同認同自己。」單身半年來，佢承認最初時整個人都好負能量，身邊朋友都指佢好容易就埋怨身邊事，佢覺得無另一半喺身邊，令自己面對問題時無咗力量面對，問到現時有無追求者？佢話：「都有幾個男仔出現，當中有已婚男士，其實初時好難知道對方已婚未，都係靠做朋友時去問多啲。」趙哲妤指多年來經師叔教導，明白世事有因果循環，最終要自己承受番。