煲呔上任特首後，噚日首次去到外國記者會（FCC），向在場嘅外籍人士推介香港有幾好。由於現場一眾嘉賓，都係紅鬚綠眼人士，要打開話匣子、用外國名人例子做開場白，都不失為一個好方法；有時拋吓書包派吓高帽，更加得到人哋刮目相看㖭。

講蕭伯納邱吉爾笑話

所以煲呔噚日一開波，就引用咗一個故事。佢話上世紀初，劇作家蕭伯納有套戲上演時，就曾經向當時英國首相邱吉爾送上兩張戲飛，邀請函就有少少幽默，寫住「請攜友觀看，如果你重有朋友嘅話」。邱吉爾嘅回覆時就話，自己當晚有事，唔可以到場，但同時指明，「可否改贈第二場門票，如果你重有第二場嘅話」。煲呔查實係藉此表達，自己好慶幸可以有第二次機會，嚟到FCC發表演說。雖然兩者關連唔算好大，但扯埋一齊講，至少令在場唔少人笑吓，算係成功喇。
煲呔其後講到新聞自由時，又借美國總統傑佛遜嘅一句名言，話「如果要喺有政府無報紙，或者有報紙無政府之間做取捨，自己毫不猶疑會揀有報紙」，佢話香港毋須有呢個憂慮，因為政府會堅決維護資訊同新聞自由，真偉大。
其實煲呔愛拋書包，引經據典，已經唔係新聞。九四年佢做庫務司時，又用電影《沉默的羔羊》橋段，話港府要向政客sayno。同年十月，佢自比《本能》主角莎朗士東，話理財時絕冇任何半點隱瞞喎，所以今次都只係重施故技啫。
煲呔噚日大舉數據，指政府統計，海外傳媒關於香港嘅新聞報道有逾五千七百宗，相比去年同期升咗成百分之二十五。跟住佢又話，國際傳媒關於香港嘅報道，大概只有少於百分之五係負面，作為政治家，佢頂得順啲鹹水同風浪嘅。

好緊張香港國際形象

對啲咁細眉細眼嘅資料都咁上心，可見煲呔幾緊張香港嘅形象，同佢緊張自己表現都不謀而合。八方發現，煲呔曾最近除咗鍾意拋書包之外，重高帽亂飛，連上司下屬都照擦，反正擦人鞋唔使本，何樂而不為？好似肥龍咁，話十月前可以出到政改五號報告，煲呔竟然讚佢叻仔。份內事啫，有乜咁叻喎。
八方心諗，立法會十月十二日先至復會，如果十月前出台，行會豈不是要九月開工，否則變成繞過行會，呢個猜測果然冇錯，知情人話行會真係九月復會，咁就啱數。


爆料熱線：29290000、27860099
報料傳真：26239278
報料電郵：[email protected]