《蘋果》讀者彭小姐日前透過「爆相爆片」,分享喺大坑摩頓台附近撞見劉曉彤湊仔女放學。當日傍晚6點半左右,劉曉彤帶住兩名工人,大陣仗接三名着校服嘅小朋友放學,未見老公現身。
做全職媽媽嘅劉曉彤,素顏兼身形發福,打扮比出鏡時樸素,唯一最易認係佢個髮型。彭小姐話:「佢都好照顧啲小朋友,見到有架手推垃圾車行緊埋嚟,佢即叫住啲小朋友停一停,擔心佢哋撞親,行嘅時候都係媽咪行先,兩位工人姐姐殿後,可能怕小朋友走失。」劉曉彤大仔已經10歲,生得幾高大,可能書包比較重,工人姐姐就幫手孭,反而兩個女就自己孭書包,彭小姐話:「佢哋都好乖,沿途都聽唔到佢哋有扭計。」劉曉彤早年現身活動時,曾自認少少怪獸家長,會教小朋友自理能力。