今季曾有三匹2015-16年度抵港之V布馬，於谷草造出全場最快末段締速，翌仗再出取得一冠一亞一殿佳績，今期(31日)又有兩匹V布同類份子「新疆紡」及「超強快駒」出賽，後駒出自今季谷草成績最好之沈集成馬房，強配潘頓有力打開在港勝門。
沈集成近七次賽事六次有馬贏，第五場四班1650米之「超強快駒」，上仗初跑快活谷角逐千二米，直路從包尾位置衝上跑第三，反映有一定質素。睇番今季共有七匹剛造最快末段之沈廐馬列陣谷草，取得三勝兩位兩第五，證明練者肯安排呢類衝得勁嘅馬在自己主場上陣，乃出擊先兆。
雖然「超強快駒」由千二米跳程角逐一哩，不過上周三沈集成有「精壯神駿」同樣增程跑一哩贏馬，前駒部署如出一轍，加上同母馬多具長力，勿因欠路程根據而睇輕。