特首梁振英嘅炒人風波，連日嚟都係政圈熱論焦點。唔奇吖，炒人炒得咁辣，令各界「大開眼界」，又點會唔惹嚟議論紛紛。花生友同政府中人傾起呢件事，大家除咗嘆氣，都唔知有乜好做，而佢哋𠵱家擔心緊，新上場嘅公務員事務局局長張雲正，唔知會有啲乜嘢柯打？唔知會唔會最終令佢哋要交好多單？
有朋友反而提醒花生友，大家遺漏咗CY喺呢件事上面嘅一點，就係逼兩位局長自動辭職，政治上可以扮到唔係炒人咁兇狠，實質上都有着數，就係幫政府慳咗一個月通知金，因為炒人要賠錢，逼佢兩個辭職，就唔使孭呢條數喎。

被炒賠償視乎合約

查實政府嘅錢，唔係落CY袋，花生友相信CY都冇乜點諗呢個問題，但本住八卦心態，都向公務員了解吓。有AO朋友話喎，按照法例，解僱即走係要畀代通知金，但係若然係AO呢，通常要走嗰啲AO都係自己瀨咗嘢而敗走，所以好多時都會傾掂自己辭職算數，因為被政府炒，始終對自己都有影響啦。
不過局長被炒點樣賠，視乎份合約點寫，例如代通知金補幾多個月？呢位AO話唔多清楚嘞。佢覺得被炒抑或辭職始終係政治決定，以佢所知，回歸以來中途離任嘅局長或政治任命官員，都係傾掂數先走。而對曾德成同鄧國威嚟講，真係多多賠償，都補唔番佢哋受嘅屈辱啦！

花生友