【睇通睇透】越跑越堅!鄭俊偉上岸有「灣」轉(魯賓遜)
睇通睇透君悅灣魯賓遜鄭俊偉上岸
練馬師榜前列的馬房,大部份頭馬來自多捷的質新馬,如蔡廐五捷馬「以奇用兵」和羅廐三捷馬「精明才子」等。
相反,練馬師榜下游馬房,質新馬數目少,要爭取成績全靠舊馬,以鄭俊偉馬房為例,今季贏過的「金剛仔」、「君悅灣」及「總統至上」都已經七歲,而「有情風」更加是上季暑期來投的九歲老馬。
周日(24日)第四場四班泥地1200米,七歲「君悅灣」來港初期由大摩訓練,跑了三季而贏過三場草地中距離賽事,全盛時最叻升到73分。
前年暑期五歲尾轉投鄭俊偉馬房,而且成功轉型為泥地專才,轉廐後跑了32仗,其中14場是泥地賽,而取得兩冠一亞三季一殿,半數賽事跑入前四名,以中年馬而言,表現已屬難能可貴。
「君悅灣」今季的部署相當明確,上半季密密跑全力減分,由63分減掉廿幾分,前仗贏泥地同程時僅評40分,大勝兩又四分三馬位,反映評分大利。
上場用不放而留的跑法亦上名,照計目前評分仲有頭馬在手。事實上,「君悅灣」現時評分仲比上季贏馬時低10分。
鄭俊偉尚欠兩場頭馬才贏夠16場達標,戰意不用懷疑,此駒今仗排4檔形勢亦有利,重配贏馬拍檔賴維銘,可期穩位望贏。