日本組合AKB48下個月初就會舉行一年一度嘅人氣總選舉，年年選舉前啲成員都會拍攝選舉海報拉票，今日啲海報已經曝咗光，最具話題性嘅一定係峯岸南，佢喺海報上面竟然扮隊友小嶋陽菜，擺個同陽菜本寫真集封面一模一樣嘅甫士，化同一個妝，粉絲大讚佢扮得似，連身在紐約嘅陽菜都越洋讚峯岸厲害。

至於指原莉乃張海報就似足選議員嘅海報，佢近日仲罕有咁拍咗輯性感水着相，仲自己晒咗幾張相做預告㖭。而上年畢咗業嘅大島優子又玩嘢，將自己喺新劇入面嘅角色整咗張假選舉海報出嚟，仲叫粉絲投佢一票㖭。