當年今日
關於我們

每日一趣:一路一帶無咁易 - 李可強

蘋果日報 2015/02/02 00:00


本欄上周提及,領導人吹水唔抹嘴,股民信以為真,就好容易中招。例如高鐵出海、核電走出去,現實同理想仲好大差距。
墨西哥剛剛宣佈放棄第二次高鐵招標,之前中鐵建(1186)中標後,被取消資格。第二次又來過,鐵路股又再炒上,尤其專為高鐵出海而搞的南北車合併,兩隻股股價爆升,今次恐將大災難。股民被玩完一次又一次,到底幾時會心死?
除了走出去以外,另一個A股當炒概念就係一路一帶,即絲綢之路經濟帶及海上絲綢之路經濟帶,因為係中共總書記習近平提出,個個以為會好掂,強國夢一定會實現,連帶交通股、航運股、基建股喺去年熱炒。其實一個基本常識係,人哋都係主權國家,唔係古時候萬國來朝時代,一定要聽你中國支笛。你要喺人哋國家搞基建,話起就起,邊有咁容易?
去年九月習近平到訪斯里蘭卡,宣佈投資十四億美元起碼頭,而家新政府上台,話要重審計劃。希臘新政府上台,亦都要終止向中國出讓港口,呢兩個都係海上絲綢之路最重要項目,而家可能通通要見財化水。至於之前緬甸變天,令國企喺當地的基建水電項目全部作廢,損失過百億元人民幣,更加不在話下。

李可強