容納30萬人口的天水圍在區選一役，逾17萬登記選民的投票率高達70.11%，在全港452個選區中，天水圍更有4個小選區被列入「最多新登記年輕選民（18-35歲）選區」，分別是天恒、宏逸、逸澤和瑞華。其中天恒人口雖比2015年區選時減少2,000人，但新登記年輕選民（18-35歲）則增加了1,003人，可見年輕人在該區比例大幅提升，影響越來越大。除了選民年輕，過半數當選人同樣為不足30歲的首次參選政治素人，年紀最小的兩名生力軍僅得22歲。經歷過數次催淚彈放題、15歲少年頭中彈事件、7.21白衣人恐襲等，從前一度被視為建制派據點的天水圍，因不少街坊隨着抗爭運動發展及警暴加劇，變得越來越同情年青人、由藍變黃，最終令天水圍一夜變天，贏得民主漂亮一仗。

記者 邵靖妍 李錦欣

因認為良知比一切重要、決定毅然「變色」變黃絲的街坊，30歲黃小姐是其中一人。已居於天水圍區內十多年的黃小姐，近月因不滿特區政府而轉軚，由支持建制派變成票投民主派，「上屆我都有份投票，但只不過係因為同阿媽食完飯，見人投，我哋都投吓，嗰時咩都唔識，見陸頌雄做咗咁耐，就投佢啦」。她坦言，自己的政治敏感度和參與度「超級低」，但近半年看到許多不公義的事，「我會有期望佢（建制派）可以幫我哋普通市民發聲，但建制派真係太偏幫政府，唔係幫我哋普通市民」。正因為建制派視警暴為無物，觸怒大部份「沉默的一群」。黃小姐指「都係因為反修例活動先開始關注時事同埋政治，呢件事話畀我知唔可以再投畀建制派嘅人」，她指看到7.21當晚兩名警察轉身離開任由白衣人傷害市民，以及何君堯與白衣人握手的畫面，令她對政治的黑暗深感驚嘆。

「冇人幫我哋發聲，香港人就要靠自己！」於是，她把自己手上的一票投予民主派候選人，更鼓勵身邊的街坊好友履行公民責任。「隔籬村都係唔關心時事，唔關心政治嘅人，我都會同佢哋講，盡量去投吓啲你冇投過嘅人。」以選票發聲，把背棄公義的建制派趕走，是和勇於區選當天最同心而行的事。「我覺得係一個好嘅開始，之前咁多屆都係建制派贏，但好似冇乜建樹。」她認為，抗爭運動給予生力軍為民服務的機會，但他們必須以前車為鑑，用心做實事，和真真正正地為民發聲。

街坊Arthur與黃小姐一樣，自評為一個「不理政治的人」，32歲的他屬今屆區選的首投族，從未投票予建制派或民主派。經過近半年的抗爭運動，他有感不得不投票，「因為搭車返工都有問題，先去慢慢了解發生咩事」。200萬人上街，成功把這「港豬」喚醒，驚覺原來《逃犯條例》的影響如此嚴重。言談間，他同時表露對內地的欣賞和懼怕，「其實大陸好好嘅，地方好靚嘅，係啲規矩亂晒，發覺香港法例原來有咁大影響（力），買淘寶都可以入罪，返大陸都可以唔小心咁樣違法咗」，他憂慮政府欲藉此例「借啲意搞掂埋香港，統一埋，大陸化」。他喜見香港仍有良心的一代，不是為錢而投票，而是真正地一人一票選出屬於自己區的區議員。要光復立法會，先要光復區議會，他相信今次一役是個好開始。他認為大部份天水圍的當選人年少是好事，能為社區注入新元素，「但他們真的要常落區，多關心長輩」，方能得到可持續的政治生涯。

年屆五旬的張先生一家扎根天水圍多年，全家四票皆投予民主派，為的不是順大勢而行，亦不是「畀機會後生仔」，而是為公義。他深信後生仔可抗衡漠視市民反應的政府，「政府當我哋細路仔，當我哋盲嘅，我哋未必會參與（抗爭運動），但我哋都睇在眼裏，知道嗰個情況」，政府應對民怨的態度令他感到不受尊重 。他身邊不少朋友由支持建制派，轉而支持民主派，「好多老人家上咗年紀，好似我咁，都仍然知道啱與錯嘅」。他認為政權遠比示威者可怕，因示威者的破壞是有目的性，但政權的暴力卻是在無差別地攻擊市民。而今次區選，正正是市民成功踏出一步踢走出賣港人的政客，並藉此要求新任區議員必須追究警暴問題，「唔可以放過！」

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568