當年今日
關於我們

【以蜜蜂做比喻】話香港人似工蜂 黃秋生:採完啲蜜糖唔係自己嘅

蘋果日報 2018/12/14 18:22

黃秋生梁國雄曾鈺成

黃秋生、林二汶、曾鈺成同梁國雄等早前拍攝ViuTV節目《人住公屋我住公屋》,分別到訪法國、丹麥、西班牙同新加坡等地嘅公屋。
黃秋生話細個都住過徙置區:「嗰時因為讀書,住咗一年左右,個廁所,真係盲嘅都搵到條路點去。」講到香港人嘅居住環境,黃秋生以蜜蜂竇做比喻:「好似啲工蜂咁,嗡嗡嗡出去採蜜,啲蜜糖又唔係自己嘅,跟住嗡嗡嗡咁又返屋企,同啲蟻差唔多。」問佢會唔會帶阿仔去公屋體驗?黃秋生話大家世界已經唔同:「佢有佢世界,我有我世界啦。佢打嗰啲機好勁,VR嗰啲,我戴30秒已經想嘔。有時我覺得佢冇禮貌,但轉頭又諗,係咪佢哋o依家係咁呢?冇得傾o架,大家語言唔同。」
至於有冇幫囝囝儲首期買樓?佢就答得好玄:「搞掂三份一,仲有三份二。佢地自己有辦法o架啦,我嗰時都乜都冇,仲窮,差啲要瞓天台水箱。後生唔驚窮,仲覺得型添,反而o依家啲後生冇乜生命力、抗打能力,冇敢作敢為。」
至於平日都會玩facebook嘅佢,有冇試過加阿仔做facebook friend,黃秋生話:「我嗰個fanpage冇呢啲,我冇私人facebook,都唔識。我平日夠忙o架啦,好多書要睇,半退休生活嘛,不過要退而不休,唔係好快死。」
另外,黃秋生最近同林嘉欣拍緊電影《死因無可疑》,佢話畀林嘉欣電到飛起,好有火花。
精選娛聞,喺晒《娛果》
http://fb.com/appledailyent
empty
黃秋生話細個因為讀書而住過徙置區
empty
曾鈺成、梁國雄
empty
林二汶