一周兩件10月8日主打亞洲水泥（743），之後股價創咗1年新高，累升30%，跑贏同期恒指3%升幅。今日整件近磅上下家，兼食正城鎮化半新股中國賽特（153），博有亞泥double升幅。

賽特主打鋼結構及預製建築組件。咁睇，城鎮化底下，阿爺計劃喺鐵路網絡等交通基建方面，追加高達6萬億人仔嘅投資金額。

再講，喺建築領域，家陣鋼結構佔祖國建築總金額只有2%，比起先進地區30%至50%，差咗一大截。唔單止城鎮化要起橋鋪路，隨住更多自貿區誕生，將會起好多高層商業樓宇，亦助長呢瓣中線發展。專業評估，到2016年，祖國鋼結構建築行業複合年增速，會達到17%。賽特鋼結構業務，已經長賺長有。

又阿爺已經落實嘅，係打造3,600萬套城鎮保障房。為支持預製組件行頭，阿爺推動加大鋼結構嘅份額，估計到咗後年，呢個建築方法，會佔總建築量近30%。

咪睇少呢個百分比，專業評估，喺保障房工程推動需求增長下，所講預製組件預期總產量，由家陣2,190萬平方米，大增到2016年時1.28億平方米，年複合增長率高達80%！賽特單係食住保障房呢條水，已經超級肥仔水。

而賽特招股時，預測純利係咁意增長30%，到近2.7億人仔，有咁好景，係事出有因。唔好多計，賽特明年度純利整多個30%增長，到3.5億人仔，預測PE得番4.5倍。賽特現價（1.21元）升60%到1.9元計數，明年度預測PE都係得6.7倍。又要考慮，賽特啱啱上個月頭先上市，一破1.24元頂，股價可以一支箭咁爆升。