年過30嘅人，相信冇玩過都會聽過「孖寶兄弟」電子遊戲，所以68歲譚詠麟同50歲李克勤一定有玩過，「孖寶兄弟」喺85年推出後成為大熱，33年後嘅今日雖然少咗人玩，但左麟右李就好有興致，扮「孖寶兄弟」look踩入東京澀谷，揸住架車在馬路上招搖過市，型到裂。

克勤貼相上社交網，寫道：「一場飯局難忘與否，其實最主要不是食物有多美味，或是環境有多舒適美輪美奐，而是看你跟誰一起共渡時光。這馬里奧賽車，其實已流行了一段時間，一直很想玩但一直沒有『腳』玩，今次一行十多人，穿着一式一樣的服裝，興致勃勃浩浩蕩蕩由日頭揸車到入黑，穿梭大街小巷，實在過癮！」 ?

除咗左麟右李之外，克勤老婆盧淑儀同邱子傑夫婦都玩埋一份，邱子傑頂帽上面仲有部攝影機，拍低沿途情況。克勤仲貼咗條短片上網，佢在片中興奮話：「我哋依家喺全東京最多人地方，好離譜呀！」老婆盧淑儀接住講：「就係澀谷啦，勁呀！」見到佢哋好high，有網民留言：「一群小可愛！」

精選娛聞，喺晒《娛果》
http://fb.com/appledailyent