【李八方online】薯片叔撐《無雙》 發哥城城「野生捕獲」齊selfie
莊文強無雙周潤發港產片郭富城曾俊華填海
【新增動新聞】
相信唔少香港人都鍾意睇戲,但睇戲睇到主角走嚟同你selfie,就唔係人人都享受到呢種禮遇,除非你係人氣超高嘅「薯片叔」曾俊華啦!
話說薯片叔尋晚孖住老婆、囡囡曾文心,同佢競選時嘅軍師羅永聰,走去九展睇佢老友「發哥」周潤發同郭富城主演嘅港產片《無雙》,鍾意影相嘅發哥再次發揮selfie特技,拉埋城城同薯片叔一行人齊齊selfie,順便展現自己嘅招牌式笑容,成功「野生捕獲」曾氏一家。
薯片叔都好識做嘅!喺自己fb貼張相之餘,仲留言大讚睇咗一套「非常優秀的港產片,編導演都是國際級水準,誠意推介。」仲留埋《無雙》同導演莊文強嘅hashtag幫手宣傳添,唔使一晚就有超過3,000人畀like讚好。其實薯片叔同發哥一向交情好好,想當年佢選特首個陣,就同喺九龍城公和荳品廠「巧遇」發哥,大家笑住食豆腐花之餘,發哥仲大讚佢「好打得」、「命硬」,仲表明自己雖然手中無票,但作為一個市民,認為薯片叔係一個「好好嘅選擇」。
但唔少留言嘅網民嘅留言,就將焦點放咗喺另一天王劉德華拍片撐填海嘅短片上面,有人要求薯片叔要同發哥講,千祈唔好似劉天王咁開腔撐填海,「發哥係香港人嘅最後堡壘呀」,有人就回覆話「發哥成日行山,佢一定知道破壞環境返唔到轉頭」,有信心發哥唔會支持填海咁話。
立會補選新聞,《蘋果》一網睇晒
http://bit.ly/appledaily1125