UNIQLO呢排人氣急升，一單北京試身室事件令唔少人搶住去「試衫」，而關於UNIQLO嘅消息亦一單接一單，公司近日就宣佈，已經結束內地網購平台京東商城嘅網店，有人就將矛頭直指京東對手阿里巴巴嘅老闆馬雲。
咁又難怪嘅，UNIQLO今年4月先至高調跟京東簽訂入駐協議，當時京東董事長劉強東仲親身到場。有京東內部人士指，UNIQLO首月銷售額已經超過預算一倍。家陣開業3個月左右就摺埋，實在奇怪。
有內地傳媒就話，成件事係阿里巴巴喺背後施壓，因UNIQLO喺阿里旗下天貓都有網舖，阿里當然唔想銷量有保證嘅UNIQLO俾對家分薄喇。另外又傳聞話，馬雲持有UNIQLO母公司迅銷嘅股份，有方法施壓，不過據了解，馬雲冇迅銷股份。