大台黃金檔兩線劇被大陸劇佔領，師奶觀眾局住睇…但原來又未必，至少仲有一部份師奶會sayno。

由星期一播到星期七嘅《武則天》，收視先跌後回，女主角范冰冰即刻度期來港造勢兼慶功；至於大導王晶八點半嗰套《風雲天地》，第一日係高開報捷，平均有26點(約168萬人次)，最高有28點(約181萬人次)。王晶更曾表示，收視一定會過30點(即約194萬人次)。

不過，《風雲》/《天地》播出後，即刻被網民揶揄係非一般「膠劇」，除咗劇情膠，連主角都一樣咁膠，收視係咁跌，上周五播第五集，更一度跌到20點(約129萬人次)，冇咗8點，即流失約517,280人次。

7.1公假日，《風雲》/《天地》收視報數平均22點(約142萬人次)，低過三線劇中唯一一部「港劇」《愛．回家》，王導當日聲稱劇好不怕被抹黑，自信會招來四方客，似乎就……

都係嗰句，一男子造就一台獨大，收視壟斷，同時強國股東接連入主大台董事局，連內地觀眾都唔睇嘅《西遊記》都放喺黃金時段播，早前又宣佈同阿里巴巴合作，打造迎合內地市場嘅「港劇」。這是文化接軌還是潛移默化洗腦？王晶會否說又是抹黑？