黎瑞恩（小恩子）將於下月29、30，喺灣仔會展舉行「黎瑞恩AllForLove慈善演唱會」，今日佢喺上環出席個唱記者會，孫敬安夫婦及趙增熹等出席。相隔11年再開騷，小恩子坦言起初口快快答應，都有諗過縮沙，好彩老公同老爺支持。咁今次個唱服飾會唔會性感呢？小恩子就笑言：「唔係想睇嘛？我驚嚇親人。」

咁係咪老公唔准呢？佢話唔係，如果露背都OK，佢又話呢排有喼弗，因為平時有肚腩，成日俾人話佢有BB，其實現時瘦咗8﹑9磅，不過佢話若再減會驚有皺紋，反而有少少肉先好，話晒佢曾經係玉女。

咁今次個唱有冇請嘉賓呢？佢話有好多嘉賓，但就拒絕透露有邊個，不過孫敬安就爆話有周慧敏及關淑怡，以及天王﹑天后，咁係咪有張學友呢？佢就避而不談。