【警衛托佢走】粉絲趁亂胸襲 泰妍印尼被推落地崩潰大喊
泰妍少女時代
韓國女團少女時代隊長泰妍噚日飛去印尼準備出席於當地舉行嘅印尼亞運會倒數活動,不過現身當地機場時獲大批粉絲包圍,就算已有數十名警衛保護佢,泰妍仍於混亂中遭粉絲胸襲。
泰妍噚日由韓國飛去印尼,佢於仁川機場出發時已被粉絲包圍,當中有相機疑似撞到泰妍嘅頭。到泰妍飛抵耶加達機場時,更獲大批粉絲接機,不過由於現場太多人,粉絲又不停湧上前包圍泰妍,當時泰妍已一直皺眉頭,露出驚慌表情,之後現場出現嚴重肢體衝突,泰妍更被不少人趁亂胸襲及摸pat,更一度將泰妍推落地,嚇得泰妍當場於地上大哭。而當地警衛見到之後連忙扶泰妍起身,並將佢扛到肩上帶離現場。
而泰妍今日凌晨就於Instagram留言表示被耶加達機場混亂嘅情況嚇到:「完全冇所謂嘅秩序,等候嘅粉絲中亦有人跟我一樣跌倒,甚至受傷,我嘅心情真係非常唔好。另外,我知道一定唔係故意,但總係碰到我嘅身體部位,好似係屁股或胸,仲有互相碰撞拉扯嘅情形。」又坦言:「我真係嚇壞啦、崩潰啦......」
泰妍坦承對於當時嘅情況非常惶恐,完全冇法重新振作精神:「因此今日冇辦法於久違到訪嘅耶加達展現出美好一面,好對唔住等待嘅粉絲,都希望各位能夠遵守秩序,唔令彼此受傷。」
至於當地警衛突然將佢扛到肩上,泰妍表示對呢個舉動其實好驚訝同恐慌,不過能理解警衛係見到佢嘅情況,而且考慮到可能有危險先會咁做:「能了解呢番好意。」
而泰妍所屬嘅SM事務所表示:「泰妍因為機場一事而受到驚嚇,不過佢已經冷靜落嚟,佢現時擔心嘅係粉絲有冇受傷。活動主辦向泰妍道歉,表示會於表演及泰妍離境時加強保安,確保安全,公司亦會確保藝人嘅安全。」